Xəbər verdiyimiz kimi, erməni “facebook” istifadəçiləri ehtiyatda olan azərbaycanlı general-leytenant Yaşar Aydəmirovun fotosunu paylaşıb. Göründüyü kimi, bu fotoda general şəhid anasının əlini öpür. Erməni “facebook” istifadəçisi Haykaz Gevorkyan fotonu “Azərbaycanlı general şəhid anasının hüzurunda. Təəssüf ki, bizdə belə deyil” başlığı ilə paylaşıb.
General Aydəmirov bildirib ki, düşmən tərəfi bizim hərəkətlərimizi təkrarlamağa çalışır.
Onun sözlərinə görə, erməni generallar heç vaxt belə bir addım ata bilməz və ancaq bizə həsəd apara bilərlər: “Ermənilərdə əsgər anasının əlini öpəcək general yoxdur. Onlar bunu etməzlər. Çünki, onlar öz torpaqları uğrunda vuruşmurlar. Onların əqidəsində bu yoxdur. Ermənistan böyük dövlətlərin müqəvvası, forpostudur. Ermənilər daim həmin dövlətlərin sifarişlərini yerinə yetirib. Tarixən bu belə olub. Necə ola bilər ki, onların generalı hansısa şəhidin anasının əlindən öpsün? Buna onların əqidələri çatmır. Biz ancaq öz torpaqlarımızı işğaldan azad etmək üçün çalışırıq və bu günü səbrsizliklə gözləyirik. Ermənilərin nə əqidəsinə, nə əxlaqına, nə də qayda qanunlarına uyğun olmayan bir haldır”.
