Nərimanov rayonu 200 saylı orta məktəbin direktoru Qafar Hüseynovun işdən çıxarılması xəbərini eşidən valideynlər hazırda bu qərara etiraz edirlər.

Musavat.com-un hadisə yerində olan əməkdaşının verdiyi məlumata görə, hazırda 100-dən çox valideyn məktəbin akt zalında toplaşıblar. Onlar direktorun yenidən öz vəzifəsinə qaytarılmasını tələb edirlər.

Narazı valideynlərin saytımıza verdiyi məlumata görə, Qafar Hüseynov çox yaxşı müdir olub və bu səbəbdən onun getməsini istəmirlər: “Qafar müəllim nümunəvi direktordur. Biz onun işdən çıxarılmasını istəmirik. Üstəlik o, hazırda xəstəxanadadır. Yıxılıb, ayağı sınıb. Burada elə valideynlər var ki, onlar sırf Qafar müəllimə görə, uzaqda yaşasalar da uşaqlarını bu məktəbə qoyublar. Qafar müəllim bu məktəbdə çox gözəl sistem qurub. Onun çıxarılmasını istəmirik”.

Hazırda Bakı Şəhər Təhsil İdarəsindən nümayəndə gəlib, valideynlərlə söhbət aparılır.

Müəllimlər deyirlər ki, sabahdan etibarən məktəbə gəlməyəcəklər. Valideynlər isə uşaqlarını məktəbə gətirməyəcəklərini deyirlər.

Bakı şəhər təhsil idarəsinin nümayəndəsi Əfqan İsgəndərov çıxışı zamanı dedi ki, məktəbdə rüşvət alınması barədə şikayət edilib. O məsələ də araşdırılır.

Əfqan İsgəndərov musavat.com-a deyib ki, direktor sağalan kimi işinə geri dönəcək: “Qafar müəllim hazırda xəstəxanadadır. Sağalsın, gələcək və vəzifəsinə davam edəcək. O ki qaldı şikayətlər məsələsinə, onu nazirlik həll edəcək”.

Öyrəndik ki, dünən nazirlik əməkdaşları məktəbdə yoxlama da aparıblar. Onlar müxtəlif sinfdlərdə şagirdlərdən müəllimlərə pul verib-vermədiklərini soruşublar.

Məsələ ilə bağlı Bakı şəhəri üzrə Təhsil İdarəsindən APA-nın sorğusuna cavab olaraq bildirilib ki, məktəbin direktoru Qafar Hüseynovun işdən çıxarılması barədə xəbərlər yanlışdır. İdarədən qeyd olunub ki, direktor hazırda fəaliyyətdədir: “Sadəcə, Qafar Hüseynov səhhəti ilə bağlı bülletendədir”.