Bu gün gecə saatlarında Bakının Qaradağ rayonunda cəbhə bölgəsində vəziyyətin gərginləşməsi ilə bağlı aksiya keçirilib. 

Aksiyada “Qarabağ” şüarları səsləndirilib. Yürüş iştirakçıları ermənilərin Tovuz istiqamətində mövqelərimizə qarşı hücumun qarşısını alan  hərbçilərimizin həlak olmasından hiddətləndiklərini, cəbhə bölgəsinə getmək, düşmənə qarşı vuruşmaq istəyində olduqlarını bildiriblər. Çoxlu sayda yürüşə qatılanların olduğu yerə, hər hansı bir təxribatın qarşısının alınması məqsədilə Çevik Polis Alayı cəlb olunub. Polislər yürüşün qarşısını alaraq,vətəndaşları dağılışmağa çağırıblar. Daha sonra Qaradağ Rayon icra başçısı Süleyman Mikayılov aksiyaçıların qarşısına çıxıb, onları səbirli,təmkinli olmağa çağırıb. İcra başçısı yürüş iştirakçılarına: “Sizi başa düşürəm, çətindir, amma Ali Baş Komandanın əmrini gözləməliyik”, – deyə müraciət edib. Süleyman Mikayılov polisə aksiyaçıları saxlamamaq göstərişini verərək ərazini tərk edib.

Bundan sonra aksiyaçılar ərazini tərk etməyə başlayıblar.

Xatırladaq ki, Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz istiqamətində Azərbaycan ordusunun mövqelərini ələ keçirmək məqsədilə artilleriya atəşlərindən istifadə edərək hücuma keçməyə cəhd göstərib. Hücumun qarşısı alınarkən, çavuş Vüqar Lətifov, baş əsgər Elşad Məmmədov, eləcə də, daha sonra, yaralanmış əsgər Xəyyam Daşdəmirov həlak olublar.