“Ümumiyyətlə, bütün savaşların sonunda döyüşən tərəflər sülh danışıqları apararkən mina xəritələri qarşı tərəfə təqdim olunur”.
Bu fikirləri politoloq Oqtay Qasımov Olaylar.az-a olan açıqlamasında bildirib:
“Azərbaycan Ermənistan arasında da proses bu cür oldu. 2020-ci il 44 günlük müharibədən sonra Azərbaycan və Ermənistan arasında aparılan danışıqlarda əsas mövzulardan biri minalanmış sahələrin xəritəsinin Azərbaycan tərəfinə təqdim edilməsi məsələsi oldu. Ermənistan guya müxtəlif vasitəçilərin dəstəyi və təşviqi ilə bir neçə dəfə Azərbaycana minalanmış sahələrin xəritələrini təqdim etdi. Məlum oldu ki, həmin xəritələr yalnız 25 faiz dəqiqliklə minaların yerini göstərə bilir. Yəni, bunlar qeyri-dəqiq xəritələrdir. Basdırılan minaların əksəriyyəti 2020-ci il Vətən müharibəsinə qədər basdırılan minalardır. Əhəmiyyətli hissəsi ermənilər tərəfdən savaşdan sonra bu təmas xəttinə basdırılıb. Ehtimal olunur ki, onların az bir qismi 44 günlük savaşın müddətində ərazilərə tələsik səpilmiş minalar ola bilər. Ümumən götürdükdə mütləq əksəriyyət basdırılmış minaların xəritələri erməni tərəfində mövcuddur. Bu baxımdan 2021-2022-ci illərdə Azərbaycana təqdim etdiyi mina xəritələrinin dəqiqliyi şübhə doğurduğundan Ermənistan bildirdi ki, guya onlar əllərində olan bütün xəritələri Azərbaycana təqdim ediblər. Amma sonradan özləri öz yalanlarını ifşa etdilər. Bir müddət öncə Ermənistan xarici işlər naziri Azərbaycana növbəti mina xəritələrinin təqdim edilə biləcəyini açıqladı. Sadəcə olaraq onun fikrində qəribə bir nüans var idi. Bu nüans ondan ibarət idi ki, Mirzoyan bildirirdi ki, oblar guya bu ərazilərdə yaşamış və bu prosesdə iştirak etmiş insanların arasında apardıqları sorğunun nəticəsində həmin xəritələri tərtib ediblər və bunu Azərbaycana vermək istəyirlər. Bu isə əslində növbəti bir manipulyasiyadır. Təqdim olunan xəritələr qeyri-dəqiq xəritələrdir. Əsl original xəritələr Azərbaycana təqdim olunmayıb. Sadəcə olaraq Ermənistan bununla beynəlxalq ictimai fikirdə belə bir fikir formalaşdırmağa çalışır ki, guya Ermənistan sülhü istəyir, Azərbaycan tərəfinə bütün minalı xəritələri təqdim edib. Azərbaycan guya sülhün tərəfdarı deyil. Amma əslində Ermənistanın mina xəritələri ilə bağlı manipulyasiyası və dəqiq xəritələri verməməsi iki məqsədə hesablanıb. Ermənistanda revanşist düşüncənin hələ də qaldığını və Ermənistanın Azərbaycanla sülhə maraqlı olmadığını, “Böyük Qayıdış” proqramı çərçivəsində vaxtilə bu ərazilərdən qovulmuş soydaşlarımızın geriyə qayıtmasının qarşısını almaq məqsədi daşıyır. Bu da ermənilərin gələcəkdə Azərbaycana torpaq iddialarını bir formada gerçəkləşdirilməsinə müəyyən imkanlar yaratmaq üçündür”.
DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 0 55 4 61 71 21 WHATSAPP
