Qarşısı alınan intiharın təfərrüatı ortaya çıxdı

Bakıda qadın azyaşlı övladı ilə birlikdə intihara cəhd göstərib. Amma Fövqəladə Hallar Nazirliyinin (FHN) əməkdaşları onun bu cəhdinin qarşısını alıblar. Bu barədə FHN-in mətbuat xidməti məlumat yayıb.

Hadisə bazar günü axşam Nərimanov rayonu ərazisində baş verib. Qadın uşağı ilə birlikdə yüksəklikdən tullanmaq istəyib. Amma xoşbəxtlikdən bunu etmək cəhdi baş tutmayıb.

Böhran Vəziyyətlərində İdarəetmə Mərkəzinə daxil olmuş məlumat əsasında Xüsusi Riskli Xilasetmə Xidmətinin müvafiq xilasetmə qüvvələri dərhal hadisə yerinə cəlb olunub. Görülən tədbirlər nəticəsində intihar cəhdinin qarşısı alınıb. Əməliyyat uğurla başa çatıb.

Nərimanov rayon hüquq-mühafizə orqanlarından verilən məlumata görə, özünə qəsd etmək istəyən qadın Göyçay rayonunda anadan olmuş, hazırda Bakıda yaşayan, 1974-cü il təvəllüdlü Salahova Mətanət Abbasağa qızıdır. Onun uşağının isə 4 yaşı var.

Qadını bu radikal addımı atmağa vadar edən səbəb artıq məlumdur. Qadın ilkin dindirmə zamanı bildirib ki, bu yolla bir müddətdir yaxın əlaqələri olan kişiyə təsir etmək istəyib. Bu əlaqədən onun övladı dünyaya gəlib.

İndi qadın istəyir ki, kişi uşağın atası olduğunu rəsmən qəbul etsin və onları himayəsinə götürsün.

Nərimanov Rayon Polis İdarəsi sözügedən kişini tapıb. O etiraf edib ki, M.Salahova ilə yaxın əlaqələri olub, amma uşağın ondan olduğuna əmin deyil.

Hazırda hüquq-mühafizə orqanlarının əməkdaşları sözügedən şəxslərlə söhbətlər apararaq onların münasibətlərinə aydınlıq gətirməyə çalışır.