Culfada cüdo üzrə rayon birinciliyi başa çatıb
Culfa şəhər 3 nömrəli tam orta məktəbin idman zalında yeniyetmələr arasında 31 Dekabr – Dünya Azərbaycanlılarının Həmrəylik Gününə həsr edilmiş cüdo üzrə rayon birinciliyinə yekun vurulub.
AZƏRTAC xəbər verir ki, Culfa Rayon Gənclər və İdman İdarəsi, Naxçıvan Muxtar Respublikası Güləş Federasiyasının Culfa rayon bölməsi, Yeni Azərbaycan Partiyası Culfa Rayon Təşkilatı Gənclər Birliyi və rayon Uşaq-Gənclər İdman Məktəbinin təşkilatçılığı ilə keçirilən birincilikdə 65 idmançı mübarizə aparıb.
Yarış əsasnaməyə uyğun olaraq 10 çəki dərəcəsində və Olimpiya sistemi üzrə təşkil edilib. Yarışdan öncə rayon Gənclər və İdman İdarəsinin əməkdaşı Elçin Cəfərov, Uşaq-Gənclər İdman Məktəbinin direktoru Şahin Qasımov çıxış edərək keçirilən tədbirin mahiyyətindən, idmana göstərilən diqqət və qayğıdan, idmanın cüdo növündə əldə olunan son nailiyyətlərdən danışıblar.
Gərgin mübarizə şəraitində keçirilən yarışda Uğur Novruzov, Mirismayıl Seyidov, Sabir Nəcəfov, Cəfər Məmmədli, Kənan Fərzəliyev, Ayxan Abbasov, Abbas Məmmədov, Asif Məmmədov, Abbas Bayramzadə və Elsevər Məmmədov öz çəki dərəcələrində rəqiblərini üstələyərək fəxri kürsünün ən yüksək pilləsində qərarlaşıblar.
Sonda qalib və fərqlənən idmançılara təşkilatçılar tərəfindən diplom və medallar təqdim edilib.