“Şuşa ili”ndə mədəniyyət paytaxtımız öz əzəmətini qaytaracaq

Azərbaycanın mədəniyyət paytaxtı, Qafqazın konservatoriyası, Qarabağın tacı olan Şuşa xalqımız üçün müqəddəs və əzəmətli bir məkandır. Şuşa sevgisi, Şuşaya olan hörmət və məhəbbət hər bir azərbaycanlının mənəvi varlığının ayrılmaz parçasıdır. Müzəffər Ali Baş Komandan, Prezident İlham Əliyevin rəhbərli altında rəşadətli Azərbaycan Ordusu Şuşanı azad etməklə onu bütün  dəyərlərin rəmzinə  çevirdi.

Ümumilikdə, təməli 1752-ci ildə Qarabağ xanı Pənahəli xan tərəfindən qoyulan və bu il 270 illiyi qeyd olunacaq Şuşa şəhəri zəngin inkişaf yolu keçib, Azərbaycanın və bütün Cənubi Qafqazın mədəni və ictimai-siyasi həyatında müstəsna rol oynayıb. Bənzərsiz tarixi görkəmini və formalaşdırdığı özünəməxsus mühiti həmişə qoruyub saxlayan bu şəhər yetirdiyi böyük şəxsiyyətləri ilə ədəbi, mədəni, elmi və ictimai fikir salnaməmizə əlamətdar səhifələr yazıb. Elə bu amilləri nəzərə alan Prezident İlham Əliyev Azərbaycanda 2022-ci ilin “Şuşa İli” elan edilməsi haqqında Sərəncam imzalayıb. Sənədə əsasən Nazirlər Kabinetinə “Şuşa ili” ilə bağlı tədbirlər planı hazırlayıb həyata keçirmək tapşırılıb.

Xatırladaq ki, Şuşa şəhərinin ötən əsrin 70-ci illərində sürətli inkişafı Ümummilli Liderimiz Heydər Əliyevin adı ilə sıx bağlıdır. Şəhərin inkişafına dair xüsusi qərarlar məhz Ulu Öndərin təşəbbüsü ilə qəbul edilib. Həmin vaxtdan Şuşada quruculuq işləri geniş vüsət alıb, mədəniyyət xadimlərimizin xatirəsinin əbədiləşdirilməsi istiqamətində mühüm addımlar atılıb. Strateji mövqeyi ilə seçilən Şuşa  Azərbaycana qarşı hərbi təcavüzə başlamış Ermənistanın silahlı qüvvələri tərəfindən 1992-ci il mayın 8-də işğala məruz qalıb. İşğal dövründə şəhərdəki yüzlərlə tarix və mədəniyyət yadigarı vandalizm aktları nəticəsində dağıdılıb. Haqq işi naminə apardığımız 44 günlük Vətən müharibəsində rəşadətli Azərbaycan Ordusu Şuşa şəhərini 2020-ci il noyabrın 8-də işğaldan azad etdi. Ermənistanın kapitulyasiyasına yol açan Şuşa qalibiyyəti xalqımızın qəhrəmanlıq ruhunun təntənəsinə çevrilərək, tariximizə Zəfər Günü kimi həkk olundu.

Zatən Prezident İlham Əliyevin göztərişi əsasında Şuşanın bərpası və yenidənqurulması işlərinə Zəfər qələbəsindən dərhal sonra start verilib. Belə ki, Şuşa zəfərindən dərhal sonra şəhərdə infrastrukturun qurulması ilə yanaşı, tarix və mədəniyyət abidələrinin bərpasına başlanılıb, quruculuq işlərinin təşkilində çevikliyin, səmərəliliyin təmin olunması üçün burada dövlət idarəetməsinə böyük diqqət yetirilib, Şuşa Şəhəri Dövlət Qoruğu İdarəsi yaradılıb. Azərbaycanın mədəniyyət paytaxtı elan edilən Şuşada bu gün şəhərin əsl tarixi simasının bərpası yönündə nəhəng layihələr gerçəkləşdirilir. Qısa müddətdə Şuşanın Baş planının hazırlanması, qüdrətli şair Molla Pənah Vaqifin büstünün və muzey-məqbərə kompleksinin öz ilkin görkəminə qaytarılması, Bülbülün ev-muzeyinin və Üzeyir Hacıbəylinin heykəlinin açılışları, habelə buradakı tarixi, dini və memarlıq abidələrinin bərpası prosesi ölkəmizin mədəniyyət paytaxtındakı kompleks işlərin tərkib hissəsidir. Cıdır düzündə “Xarıbülbül” musiqi festivalının və Vaqifin möhtəşəm məqbərəsi önündə Vaqif Poeziya Günlərinin təşkili ənənəsinin bərpası da göstərir ki, Şuşa sürətlə dirçələrək əvvəlki dolğun mədəni həyatına qovuşmaq yolundadır. Qeyd edək ki, Prezident İlham Əliyevin 2022-ci ili “Şuşa ili” elan etməsi möhtəşəm hadisəyə çevrildi və ölkənin şanlı tarixinin qızıl salnaməsinə yazılacaq. 2022-ci il Şuşanın həyatında ən yaddaqalan il olacaq. Bu il parlaq və təntənəli tədbirlərlə – festivallar, konsertlər, müsabiqələr, sərgilər, yaradıcılıq layihələri, poeziya gecələri, yubileylərlə yadda qalacaq, qədim mədəniyyətimizin və incəsənətimizin bütün palitrası təqdim olunacaq. Hər bir azərbaycanlı üçün müqəddəs olan bu şəhərə tez-tez səfərlər təşkil olunacaq, o cümlədən xarici qonaqlar üçün. Şuşa öz əzəmətini qaytaracaq və bütün dünya bu şəhərdə baş verən möhtəşəm hadisələri izləyəcək.

Millət vəkili Məlahət İbrahimqızı qeyd edib ki, Prezident İlham Əliyevin 31 Dekabr – Dünya Azərbaycanlılarının Həmrəyliyi Günü və Yeni il münasibətilə Azərbaycan xalqına təbrikində 2022-ci ili “Şuşa İli” elan etməsi xəbərinin sevinci hələ də davam edir. Bu tarixi xəbər həm Azərbaycanda, həm də ölkəmizin hüdudlarından çox uzaqlarda minnətdarlıq və məmnunluqla müzakirə edilir, tezliklə bu il çərçivəsində keçiriləcək tədbirləri gözləyirlər. Qeyd etmək lazımdır ki, 44 günlük Vətən müharibəsindən sonra, post müharibə, Zəfər və quruculuq ili olan 2021-ci ilin ardınca 2022-ci ilin “Şuşa İli” elan edilməsi Prezident İlham Əliyevin bir daha müdrikliyinin və uzaqgörənliyinin nəticəsi idi. Belə bir qərar, əslində, Azərbaycanın tarixən mədəniyyət paytaxtı olan Şuşanın beynəlxalq aləmdə tanıdılması baxımından çox önəmli idi. Əlbəttə, belə bir qərar böyük siyasi, tarixi və hüquqi əhəmiyyətə malikdir. İşğaldan azad edilən torpaqlarımızın minalardan tam təmizlənməməsinə, quruculuq işlərinin bitməməsinə baxmayaraq, keçən il Şuşada müxtəlif əhəmiyyətli tədbirlər keçirilməsi sözsüz ki, həm də dünyada erməni yalanının ifşasına yönəlmişdi. Deputat bildirib ki, Azərbaycan 30 illik müstəqillik tarixinə malik gənc dövlətdir: “Sovet dönəmində Azərbaycan dünyaya açıq deyildi. Bu səbəbdən son iki yüz ildə xalqımıza qarşı qurulmuş məkrli planlar fonunda Qarabağın, Şuşanın tarixi Azərbaycan torpağı kimi dünyada tanıdılması mümkün deyildi. Amma həmin dövrlərdə erməni diasporu tərəfindən xaricdə saxtalaşdırılmış və erməni yalanı ilə uydurulmuş Azərbaycan əleyhinə təbliğat davamlı olaraq aparılırdı. Erməni diasporu utanmadan və usanmadan dünya ictimaiyyətinə Azərbaycan və Türkiyə düşmənçiliyi üzərində qurulmuş faşist ideologiyasını təbliğ etdirirdi. Bildiyimiz kimi, sovetlərin süqutu ərəfəsində Qarabağ işğal edildi. Həmin qüvvələr Qarabağın, eləcə də Şuşanın erməni torpağı olması haqda dünyada təbliğat aparırdılar. Məhz bu səbəbdən də 2022-ci ilin “Şuşa İli” elan edilməsi qərarını da zəruri ehtiyac və sosial sifariş kimi qəbul etmək olar. Təkcə hərbi-siyasi yolla deyil həm də mədəniyyət diplomatiyası ilə Şuşanın tarixən Azərbaycanın ayrılmaz parçası olduğunu hər kəs görəcək. Keçiriləcək tədbirlərlə 270 il öncə inşa edilən Şuşa qalası və şəhəri mədəniyyəti, tarixi, yerləşdiyi coğrafiyası, bəşər mədəniyyətinə verdiyi töhfəsi ilə dünyada tanınacaq, erməni yalanı və revanşistləri bir daha ifşa ediləcək. Bildiyimiz kimi Kürəkçay, Gülüstan, Türkmənçay və Qars müqavilələri kimi sənədlər tariximizin silinməz səhifələrində tarixi gerçəkliyi əks etdirir, bu sənədlər gələcəkdə də öz hüquqi qüvvəsini saxlayacaq. Bu mənada Azərbaycan Respublikası ilə Türkiyə Respublikası arasında müttəfiqlik haqqında Bəyannamənin imzalandığı məkan olaraq Şuşa şəhəri çağdaş tariximizin qızıl hərflərlə yazılmış səhifələrində qardaşlığın və dostluğun bir daha əbədiləşməsinin şahidi kimi qalacaq. 2022-ci ilin “Şuşa İli” elan edilməsi, onun Azərbaycan xalqının tarixi şəhəri olmasını dünyaya sübut edəcək. “Şuşa İli” çərçivəsində həyata keçiriləcək mükəmməl tədbirlərdə iştirak edəcək hər bir qonaq, Şuşanın, Qarabağın, bütövlükdə Azərbaycanın təbliğatçısına və xoşməramlı səfirinə çevriləcək”.

Alim

DİQQƏT! Şikayət və təklifləriniz, gördüyünüz və eşitdiyiniz hər hansı bir maraqlı məlumatı bu nömrəyə göndərin: 055 461 71 21 WHATSAPP