Xaricdə yaşayan soydaşlarımızdan Ali Baş Komandana təbrik məktubları gəlməkdə davam edir

30 ilə yaxındır Ermənistanın işğalı altında olan Azərbaycan torpaqlarının azad
edilməsi, xüsusilə qədim mədəniyyət mərkəzi Şuşa şəhərinin düşməndən təmizlənməsi
xaricdə yaşayan azərbaycanlıların böyük sevincinə səbəb olub. Ayrı-ayrı soydaşlarımız,
eləcə də diaspor təşkilatları adından Prezident İlham Əliyevə ünvanlanan məktublarda
müzəffər Ali Baş Komandana və rəşadətli ordumuza minnətdarlıq ifadə olunur.
Rusiya, Ukrayna, Türkiyə, Gürcüstan, Türkmənistan, Qazaxıstan, Qırğızıstan,
Almaniya, İsveçdə yaşayan soydaşlarımız, Belçikadan Avopa Azərbaycanlıları Konqresi
cənab Prezidentə göndərdikləri məktublarda böyük qələbə münasibətilə Azərbaycan
ordusu və Ali Baş Komandanı təbrik edir, onların şücaəti ilə qürur duyduqlarını bildirirlər:
“Şuşanın Azərbaycana, Azərbaycanın Şuşaya olan 28 illik həsrətinə Siz son qoydunuz.
Xalqımızın 30 ilə yaxındır həsrətində olduğu Şuşa şəhəri artıq düşməndən geri alınıb.
Şəhidlərimizin qanı yerdə qalmadı! Şəhidlərimizin ruhu şaddır! Möhtərəm Ali Baş
Komandan! Sizin adınız bu qələbə tarixinin ən gözəl səhifəsində qızıl hərflərlə yazılıb”.
Müraciətlərdə Azərbaycan diasporunun Vətənimizə, dövlətimizə, Prezidentimizə və
ordumuza dəstəyi xüsusi vurğulanır. Soydaşlarımız dünyanın harasında yaşamasından
asılı olmayaraq dövlətimizə xidmətə və cənab Prezidentin əmrinə hər zaman hazır
olduqlarını bəyan edirlər.
Qeyd edək ki, işğalçı Ermənistan ordusunun 27 sentyabr 2020-ci il tarixdən
başlayan təxribatçı hərəkətlərinə cavab verməyə məcbur olan Azərbaycan ordusunun
əldə etdiyi uğurlarla bağlı xarici ölkələrdə yaşayan soydaşlarımız tərəfindən Ali Baş
Komandana 100-dən çox təşəkkür məktubu ünvanlanıb.