Uğursuz xəyalpərəstlər
İnformasiya texnologiyaları həyatımıza çox yeniliklər gətirib. Cəmiyyətlər artıq informasiya burulğanına düşüb və insanlar bu burulğanda virtual dünyanın qasırğasına duruş gətirməyərək fəzada uçuşan gücsüz canlılara bənzəyirlər. Virtual dünyadan kənarda dayanan insanlar hələ də real həyatdadırlar, nəyi və niyə etdiklərini düşünür və başa düşürlər. İnsanların digər bir hissəsi qismən virtual, qismən real dünyada yaşayırlar. Üçüncü bir qisim insanlar da var ki, onlar bütünlüklə real dünya ilə vidalaşıb virtual dünyada lövbər salıblar. Bunlar cəmiyyətin az bir hissəsidir. Psixoloqlar və psixiatrlar bu cür şəxsləri cəmiyyətin yaralı və zədəli hissəsi hesab edirlər. Özünü real həyatda isbat edə bilməyən, arzu və istəkləri ilə bilik və qabiliyyətləri üst-üstə düşmədiyindən real həyatda özlərinə arzuladıqları yeri tapa bilməyən belə şəxslər o yeri virtual dünyada tapır, öz mövcudluqlarını orada sürdürməyə çalışırlar. Get-gedə virtual reallıqlara daha çox inanır və özü haqqında virtual dünyada yaratdığı mifik qəhrəman obrazını da reallıq kimi dərk edir. Tibb elmində bu əlamətlərin anemnezi “şizofreniya” adlanır.
Lakin belə düşünməyək ki, bu xəstəliyə yalnız bizim ölkəmizdə rast gəlinir. Onları dünyanın hər yerində görmək mümkündür. Məsələn, Londonun məşhur Hayd Parkında “Natiqlər guşəsi” (Speaker corner) adlanan bir yer var. Vaxtilə, hələ kütləvi informasiya vasitələri mövcud olmayanda siyasətçilər, filosoflar bu guşəyə gələr və onları dinləmək istəyən insanlar məhz o yerdə onların başına yığışar və onlara qulaq asmaqla dünyanı dərk etməyə çalışardılar. O zamanlardan çox əsrlər keçib, dünya dəyişib. İndi “Natiqlər guşəsi”-nin natiqləri dünyanın müxtəlif ölkələrindən gəlmiş, el arasında “dəli” və ya “ağıldan kəm” adlandırılan, amma əslində həkimlərin şizofreniya diaqnozu ilə müalicə etməyə çalışdıqları insanlardır. Onlar özləri ilə gətirdikləri kətilin üzərinə çıxıb, gördükləri qallüsinasiyaları reallıqmış kimi ətrafına toplaşan turistlərə təqdim edirlər. Bu “natiqlərin” bəziləri Amerika prezidentini tənqid edir, ona yol göstərir, bəziləri isə özlərini Emmanuel Makron kimi təqdim edib, təbəssümlə onları seyr edənlərə “moizə” oxuyurlar. İngiltərə höküməti bu insanların şizofreniya xəstələri olduğunu anlayaraq onların Hayd Parkda yığışmalarına və danışmalarına heç bir maneə yaratmır, çünki bu guşənin özü də parka gələn turistlər üçün bir şou səhnəsidir.
Azərbaycan höküməti də söz demək və danışmaq istəyən kəslərə heç bir maneə yaratmır. Humanizm prinsiplərinə söykənərək bu şəxslərə də şərait yaradır ki, öz təxəyyüllərində özləri haqqında yaratdıqları virtual “qəhrəman”, “vətənpərvər”, “demokratik lider” obrazlarını sərbəstcəsinə təqdim edə bilsinlər. Belə humanist və demokratik bir ortamda Əvəz Zeynallı və Zaur Qəriboğlu kimi şizofrenniklər kətillərini darısqal bir otaqda qoyub, onların “Youtube” kanalına gəlmiş “turistlər” qarşısında çıxış edirlər, eynilə Hayd Parkda olduğu kimi.
Əvəz Zeynallı və Zaur Qəriboğlu kimdir?
Hər iki şəxslə bağlı bir qədər araşdırma apardım. Məlum oldu ki, “Əvəz Zeynallı” adlı şəxs 1991-ci ildə Türkiyəyə təhsil almağa gedib və 1999-cu ildə oradan qayıdıb. Görünür, təhsilini başa vurduqdan sonra bir müddət oralarda dələduzluq edib, artıq oralarda qalmaq mümkün olmadıqda Azərbaycana qayıdıb. Cəmi 3 il ərzində bir neçə redaksiyada işləyib və hər yerdən qovulub. Nəhayət, özünə qəzet açıb və “müqəddəs arzularını” həyata keçirmək istəyib. Nəticədə 2011-ci ildə şantaj yolu ilə varlanmaq arzusu ilə imkanlı şəxslərdən pul qopararkən Əvəz Zeynallı həbs olunub. Külli miqdarda rüşvət alma, hədə-qorxu tətbiq olunmaqla rüşvət alma və təkrar rüşvət almada ittiham olunan bu dələduz həmçinin xeyli miqdarda vergiləri və məcburi dövlət sosial sığorta haqlarını dövlət büdcəsinə ödəmək əvəzinə oğurlayaraq mənimsəyibmiş. Həbsdən çıxandan sonra özünü yenidən “jurnalist” elan edib. Real həyatdakı uğursuzluqlarını kompensasiya etmək üçün virtual dünyada özünü görmək istədiyi formada təqdim etməyə başlayıb. Bu məqsədlə də “siyasət meydanı” adlandırdığı bir guşə yaradıb, orada kətilin üstündə oturub, Hayd Parkdakılar kimi moizə oxuyur. Özü üçün seçdiyi güşənin adını və formatını da Türkiyə televiziyalarında iz buraxan Ali Kırıcanın “Siyaset meydanı” verilişindən götürüb. Yəni plagiatlıq edib. Yəqin ki, bu da virtual dünyada Türkiyədə təhsil aldığı illərdə izlədiyi “Ali Kırıca fenomeni olmaq” arzusunun təzahürüdür. Dolayısı ilə yuxarıda adını çəkdiyim xəstəliyin bütün əlamətləri artıqlaması ilə yerində görünür.
Zaur Qəriboğlu adlı şəxs isə “Wikipedia” səhifəsində göstərdiyi kimi “…müxtəlif kütləvi informasiya vasitələrində müxbir, redaktor, bədii redaktor, baş redaktor vəzifələrində çalışmışdır. 2016 – cı ilin fevral ayının 1-dən isə 5 dildə (Azərbaycan, ingilis, rus, türk, ispan) fəaliyyətə başlayan “Karabakh Today” (www.karabakh.today) Beynəlxalq Analitik İnformasiya Portalının təsisçisi və baş direktorudur”.
Doğrusu, bu məlumat məni çox maraqlandırdı və Zaur Qəriboğlunun vətənpərvər bir insan ola biləcəyini də düşündüm. Amma adıçəkilən portala girən kimi hər şey aydın oldu. 2020-ci il başlayandan Portalın Azərbaycan dilli səhifəsində cəmi 3 gündə – 17, 18 və 21 yanvar tarixlərində xəbərlər yerləşdirilib. Portalın türk dilli səhifəsində sonuncu dəfə xəbər 2019-cu ilin 28 fevral tarixində saat 12.57-də yerləşdirilib. 2019-cu il ərzində isə cəmi 3 məqalə-xəbər yerləşdirilib. Portalın ingilis dilli səhifəsində bütün 2019-cu il ərzində cəmi 6 dəfə məlumat yerləşdirilib. Davamı yoxdur. Portalın ispan dilli səhifəsində də son yenilənmə 6 fevral 2019-cu ildə, saat 20.18-də olub.
Daha maraqlısı isə budur ki, ara-sıra gözdən pərdə asmaq üçün yenilənən bu portaldakı bütün xəbərlər müxtəlif mətbu orqanlarında çıxan məqalə və şərhlərin kəsilib səhifədə yerləşdirilməsindən ibarət olub. Zaur Qəriboğlu baş redaktorun və ya jurnalistin fəaliyyətinin bundan ibarət olduğunu düşünürsə, deməli, onun bu işdən anlayışı yoxdur. Yox, əgər bilir, amma bu cür edirsə, deməli plagiatlıq və dələduzluqla məşğuldur.
Zaur Qəriboğlu “Wikipedia”da özü haqqında yazdığı məlumatda bildirir ki, 1 iyul 2018 – ci il tarixdə “ReaksiyaTV” internet televiziyasını yaradıb, hazırda da televiziyaya rəhbərlik edir. Bu dələduz bir tərəfdən idarə etmək iddiasında olduğu portalın səhifələrini prezidentin və vitse-prezidentin fotoları ilə bəzəyib, digər tərəfdən isə “Reaksiya TV” adlandırdığı “Hayd Park kətili”nin üstündə oturub, insanları dövlətə və dövlətin apardığı siyasətə qarşı ayağa qalxmağa çağırır. Başqa sözlə, gah nala, gah mıxa vurur, yəni riyakarlıq edir. Bəzilərinin “Sən kişi adamsan”, “sən AZTV-nin sədri olmalısan”, “sən deputat olmalısan” kimi şərhləri bu bədbəxt Zauru elə həvəsləndirir ki, qoltuğunun altı qarpızlanır. Və yazıq inanır ki, yəqin elə belə də olmalıdır. Hayd Parkda olduğu kimi, Reaksiya TV-yə də hər gün bir neçə “turist” baş vurur və bundan ehtizaza gələn Zaur qallüsinasiyalarında özünü AZTV-də Rövşən Məmmədovun yerində və ya Milli Məclisdə millət vəkili kürsüsündə də təsəvvür edir. Görünür, Zaur uşaqlıq illərində televiziya diktorlarına baxıb həsəd aparıb, o da efirə çıxıb hamı tərəfindən tanınmaq istəyib. Amma böyüyəndə buna qabiliyyəti, savadı çatmadığı üçün virtual aləmə üz tutub, özünü görmək istədiyi yerdə göstərməyə çalışır. Psixiatrların dediyi zədə elə həmin zədədir.
Ona görə Əvəz Zeynallıya və Zaur Qəriboğluya sosial və ənənəvi mediada sərt reaksiya verənlərə və təpki göstərənlərə üzümü tutub deyirəm, işiniz olmasın, onlar xəstədir. Onları da Allah belə yaradıb. Humanist olmağa çalışın. Axı biz gərək sağlam adamlar olaraq xəstələrə güzəştli yanaşaq.
Bəs Cavanşir Feyziyev kimdir?
Nəhayət, Cavanşir Feyziyev haqqında da deməyə bilmərəm. Cavanşir Feyziyevi 10 ildir ki, şəxsən tanıyıram. Öz dövlətinə, millətinə, tarixinə, kökünə, əsrlər boyunca formalaşan milli kimliyimizə və dəyərlərimizə nə qədər bağlı olduğunu ən yaxşı bilənlərdən biriyəm. Cavanşir Feyziyev müəllim ailəsində dünyaya göz açıb, böyümüş, mükəmməl təhsil almış, 5 dildə sərbəst danışan və yazan, əsərləri dünyanın 10-dan çox dilinə tərcümə olunmuş, sovet Azərbaycanında hələ 1987-ci ildə ilk özəl müəssisələrdən birini – “Linqvist” tədris-tərcümə kooperativini yaratmış və hələ sovet dövründən öz zəhməti ilə kifayət qədər sərvət qazanmış bir şəxsdir. Müstəqillik dövründə isə zaman-zaman özəl biznes müəssisələri yaradıb, onları dünyanın ən qabaqcıl metodları ilə idarə edib, sonda həmin biznesləri ən yüksək səviyyəyə çatdırıraraq digər iş adamlarına satıb. Sahib olduğu maddi gücünü öz zəhməti ilə, yüksək intellekti və nadir təşkilatçılıq qabiliyyəti ilə qazanıb. 2010-cu ildə Milli Məclisə üzv seçilib və həmin gündən biznes fəaliyyətini dayandırıb, siyasətlə məşğul olmağa başlayıb. Son Çağırış Milli Məclisdə ölkəmizlə Avropa Parlamenti, Fransa və Böyük Britaniya qanunverici qurumları arasında parlamentlərarası əlaqələrin qurulması işini uğurla aparıb, müvafiq qruplara sədrlik edib. Cavanşir Feyziyevin Türk dünyası və onu təmsil edən dövlətlərin və xalqların birliyi üçün göstərdiyi fəaliyyət bir türk olaraq məni də qürurlandırır. Onu türk dünyasının bütün ünlü şəxsləri tanıyır və rəğbət bəsləyirlər. Bir millət vəkili olaraq hər zaman təmsil etdiyi millətin yanında, seçiciləri ilə yaxın təmasdadır.
Əvəzlər və zaurlar, sizin kimi dələduzlardan fərqli olaraq onun nə şadlıq evləri, nə restoranları, nə də zavod-fabrikləri olub. Əlbəttə, ola bilərdi, onun buna imkanı çatardı. Amma o həmişə özünü dünya malından yüksəkdə tutub. O sizlər kimi, əlində-cibində və beynində olanlarını heç vaxt heç kimdən gizlətməyib, həmişə sadə xalqın yanında olub və hər şeyini onlarla bölüşüb. 80-ci illərdən başlayaraq həmişə insanlar ona pənah gətirib və hamının dərdinə əlac tapmağa çalışıb, tanıdığı və tanımadığı kimsəyə ögey münasibət göstərməyib.
Bəs siz əvəzlər, zaurlar bu xalq üçün, millət üçün nə etmisiz? Hansı bir yetimin göz yaşlarını silmisiniz, hansı bir acın süfrəsinə evinizdən gətirib bir parça çörək vermisiniz? Kimisə son nəfəsində xəstəlikdən qurtarıb, ailəsinə geri qaytarmağa yardım əlinizi uzatmısınız? Belə hislərdən və mənəvi dəyərlərdən məhrum olduğunuz halda hansı haqla tanımadığınız insanları öz aləminizdə “mühakimə” edirsiniz? Əgər hələ də düşünürsünüzsə ki, onu hədəfə almaqla kimsə sizə yaxınlaşıb sizinlə “dil tapmağa” çalışacaq, tam yanılırsınız. Məgər Əvəz bu vərdişini hələ də tərgitməyib? Elə isə bilin və agah olun! Cavanşir Feyziyev belələrindən deyil. Cavanşir Feyziyevin və onun kimi digər vicdanlı zənginlərin sizin kimi dələduzlarla “dil tapmağa” ehtiyacları yoxdur. Onların başları hər zaman dövlət qarşısında ucadır, adları isə xalqın dilində və ürəyindədir. Sizlər isə virtual dünyanızın zibilliyində eşələnirsiz və heç vaxt oradan çıxa bilməyəcəksiniz.
İnsan ləyaqətinin, vətəndaş məsuliyyətinin, insanlığa sevgi və mərhəmət hislərinin ən gözəl örnəyini təqdir etmək əvəzinə ona şər-böhtan atmağa cəhd göstərənlər yalnız bu milləti və bu vətəni sevməyən insanlar ola bilər. Bağışlayın, az qala unutmuşdum, bir də yaralı və zədəli təxəyyüllündə özünü vacib bir nəsnə hesab edən əvəzlər və zaurlar. Allah sizə şəfa versin, uğursuz xəyalpərəstlər!
Babək Ağayev